သီတင်းကျွတ်လပြည့်နေ့သည် မြန်မာဗုဒ္ဓဘာသာဝင်များအတွက် ဆီမီးပူဇော်ခြင်း၊ ကုသိုလ်ကောင်းမှုများ ပြုလုပ်ခြင်းနှင့် မိဘ၊ ဆရာသမား၊ လူကြီးသူမများကို ဂါရဝပြုကန်တော့ခြင်းတို့ ပြုလုပ်ကြသည့် နေ့ထူးနေ့မြတ်တစ်နေ့ ဖြစ်ပါတယ်။ မြတ်စွာဘုရားရှင်၏ အဘိဓမ္မာတရားတော် ဟောကြားမှုနှင့် ဆက်နွှယ်သည့် အခါသမယဖြစ်သောကြောင့် သီတင်းကျွတ်လပြည့်နေ့ကို အဘိဓမ္မာအခါတော်နေ့ဟု ခေါ်ဆိုကြပါတယ်။

✨ အဘိဓမ္မာအခါတော်နေ့ ဖြစ်ပေါ်လာပုံ

ဗုဒ္ဓဘာသာ ထုံးတမ်းအစဉ်အလာအရ မြတ်စွာဘုရားရှင်သည် သတ္တမဝါတွင် တာဝတိံသာနတ်ပြည်သို့ ကြွရောက်တော်မူပြီး နတ်ဗြဟ္မာအပေါင်းတို့အား အဘိဓမ္မာတရားတော်ကို ဝါတွင်းသုံးလပတ်လုံး ဟောကြားတော်မူခဲ့ပါတယ်။

အဘိဓမ္မာတရားတော် ဟောကြားပြီးမြောက်သည့် သီတင်းကျွတ်လပြည့်နေ့တွင် မြတ်စွာဘုရားရှင်သည် တာဝတိံသာနတ်ပြည်မှ လူ့ပြည်သို့ ပြန်လည်ကြွမြန်းတော်မူခဲ့ပါတယ်။ ထိုအခါသမယကို အထိမ်းအမှတ်ပြု၍ သီတင်းကျွတ်လပြည့်နေ့ကို အဘိဓမ္မာအခါတော်နေ့ဟု ခေါ်ဆိုကြပါတယ်။

မြတ်စွာဘုရားရှင် လူ့ပြည်သို့ ပြန်လည်ဆင်းသက်တော်မူခြင်းကို ကြိုဆိုပူဇော်ရန် ဆီမီးများ ထွန်းညှိပူဇော်ခဲ့ကြသည့် အစဉ်အလာကိုအကြောင်းပြု၍ သီတင်းကျွတ်ကာလတွင် ဆီမီးထွန်းပူဇော်ခြင်းဓလေ့ ဆက်လက်တည်ရှိလာခဲ့ပါတယ်။

🪔 သီတင်းကျွတ် မီးထွန်းပူဇော်ခြင်း၏ အဓိပ္ပာယ်

သီတင်းကျွတ်ကာလတွင် ထွန်းညှိပူဇော်ကြတဲ့ ဆီမီးအလင်းရောင်တွေဟာ အလှဆင်ခြင်းသက်သက်မဟုတ်ဘဲ မြတ်စွာဘုရားရှင်၏ ဓမ္မတရားတော်ကို အောက်မေ့ဂုဏ်ပြုခြင်းနဲ့ ဓမ္မကို ရိုသေမြတ်နိုးခြင်းတို့ကို ဖော်ပြတဲ့ အစဉ်အလာတစ်ရပ် ဖြစ်ပါတယ်။

အလင်းရောင်က အမှောင်ကို ဖယ်ရှားပေးသကဲ့သို့ ဓမ္မအသိနဲ့ ပညာကလည်း မိမိတို့ရဲ့ မောဟနဲ့ မမှန်ကန်တဲ့ အမြင်တွေကို ဖယ်ရှားနိုင်စေပါတယ်။ ဒါကြောင့် ဆီမီးပူဇော်ခြင်းနဲ့အတူ တရားတော်ကို လေ့လာခြင်း၊ ကုသိုလ်ကောင်းမှု ပြုလုပ်ခြင်းနဲ့ မိမိရဲ့ စိတ်နေစိတ်ထားကို ပြန်လည်ဆင်ခြင်ခြင်း တို့ကိုလည်း အလေးထားသင့်ပါတယ်။

🙏 သီတင်းကျွတ်ကာလတွင် ပြန်လည်ဆင်ခြင်သင့်သော အရာများ

သီတင်းကျွတ်ကာလဟာ မိဘ၊ ဘိုးဘွား၊ ဆရာသမားနဲ့ ကိုယ်လေးစားရသူတွေကို ဂါရဝပြုကန်တော့ပြီး ကျေးဇူးတရားကို ပြန်လည်ဖော်ပြဖို့ အချိန်ကောင်းတစ်ခုလည်း ဖြစ်ပါတယ်။မိဘနဲ့ လူကြီးသူမတွေကို ကန်တော့ခြင်း၊ ဆရာသမားတွေကို ဂါရဝပြုခြင်းနဲ့ ချစ်ခင်ရသူတွေအပေါ် မေတ္တာထားခြင်းတို့ဖြင့် ကျေးဇူးတရားကို ဖော်ပြနိုင်ပါတယ်။သီတင်းကျွတ်ရဲ့ တန်ဖိုးဟာ အပြင်မှာ မီးရောင်တွေ ထွန်းလင်းခြင်းနဲ့အတူ မိမိရဲ့ စိတ်နှလုံးထဲမှာလည်း မေတ္တာ၊ ဂါရဝနဲ့ ကောင်းမြတ်တဲ့စိတ်ထားတွေ ထွန်းလင်းလာစေခြင်း ဖြစ်ပါတယ်။

🪔 သီတင်းကျွတ် အဘိဓမ္မာအခါတော်နေ့မှစ၍ ကမ္ဘာသူကမ္ဘာသားအားလုံး စိတ်ချမ်းသာ၊ ကိုယ်ကျန်းမာပြီး မေတ္တာနဲ့ ငြိမ်းချမ်းခြင်းများ ပြည့်ဝကြပါစေကြောင်း ဂမုန်းပွင့်မိသားစုမှ ဆုမွန်ကောင်းတောင်းအပ်ပါတယ်။ 🪔🙏

🌟 အချို့သောအချက်အလက်များအား Internet မှတဆင့် ကိုးကားပါသည်။