မြန်မာနိုင်ငံတွင် နှစ်စဉ် မိုးရာသီအတွင်း ရေကြီးရေလျှံမှုများ မကြာခဏ ဖြစ်ပွားလေ့ရှိပြီး အသက်အန္တရာယ်၊ ကျန်းမာရေးပြဿနာများနှင့် ပိုင်ဆိုင်မှုပျက်စီးဆုံးရှုံးမှုများကို ဖြစ်စေနိုင်ပါသည်။ သို့သော် မှန်ကန်သော ကြိုတင်ပြင်ဆင်မှုများနှင့် လုံခြုံရေးအချက်များကို သိရှိထားခြင်းက အရေးပေါ်အခြေအနေများတွင် ပိုမိုလုံခြုံစွာ တုံ့ပြန်နိုင်ရန် အထောက်အကူဖြစ်စေပါသည်။

ဤ Blog တွင် "မဖြစ်ခင်၊ ဖြစ်ဆဲ၊ ဖြစ်ပြီး" အဆင့် (၃) ဆင့်အလိုက် လိုက်နာသင့်သော အချက်များကို စုစည်းဖော်ပြထားပြီး မိမိနှင့် မိသားစု၏ ဘေးကင်းလုံခြုံရေးအတွက် လက်တွေ့အသုံးဝင်သော အကြံပြုချက်များကို ရရှိနိုင်ပါသည်။

၁။ ရေမကြီးခင် ကြိုတင်ပြင်ဆင်ရန် အချက်များ

ရေဘေးအန္တရာယ်ကို လုံးဝတားဆီးနိုင်ခြင်း မရှိသော်လည်း ရေကြီးတတ်သောဒေသများတွင် ကြိုတင်ပြင်ဆင်ထားခြင်းက အသက်အန္တရာယ်နှင့် ပိုင်ဆိုင်မှုပျက်စီးဆုံးရှုံးမှုများကို လျှော့ချနိုင်ရန် များစွာအထောက်အကူပြုပါသည်။ အောက်ပါအချက်များကို ကြိုတင်ပြင်ဆင်ထားသင့်ပါသည်။

မိုးလေဝသသတင်းများကို စောင့်ကြည့်ပါ_မိုးလေဝသနှင့် ဇလဗေဒညွှန်ကြားမှုဦးစီးဌာနနှင့် ဒေသဆိုင်ရာ တာဝန်ရှိအဖွဲ့အစည်းများ၏ သတိပေးချက်များကို အချိန်မီ လိုက်နာပါ။

အရေးကြီးစာရွက်စာတမ်းများကို လုံခြုံစွာ သိမ်းဆည်းပါ_မှတ်ပုံတင်၊ အိမ်ထောင်စုစာရင်း၊ ဘဏ်စာအုပ်နှင့် အခြားအရေးကြီးစာရွက်စာတမ်းများကို ရေမဝင်နိုင်သောအိတ် (သို့မဟုတ်) ဘူးအတွင်း ထည့်သိမ်းထားပါ။

အရေးပေါ်အသုံးအဆောင်များကို အသင့်ပြင်ဆင်ထားပါ_ ဆေးဝါး၊ ဓာတ်မီး၊ Power Bank၊ သောက်ရေသန့်နှင့် အသင့်စားအစားအစာများကို အလွယ်တကူ ယူဆောင်နိုင်မည့် နေရာတွင် စုစည်းထားပါ။

ရွှေ့ပြောင်းမည့် လမ်းကြောင်းကို ကြိုတင်သတ်မှတ်ထားပါ_ရေကြီးလာပါက သွားရောက်ခိုလှုံမည့် ကုန်းမြင့်နေရာ (သို့မဟုတ်) ကယ်ဆယ်ရေးစခန်းနှင့် သွားရမည့်လမ်းကြောင်းကို မိသားစုဝင်များနှင့် ကြိုတင်တိုင်ပင်ထားပါ။

အချိန်အနည်းငယ်ပေးပြီး ကြိုတင်ပြင်ဆင်ထားခြင်းက အရေးပေါ်အခြေအနေတွင် ဆုံးရှုံးမှုများကို လျှော့ချနိုင်ပြီး မိသားစု၏ လုံခြုံရေးကို ပိုမိုကာကွယ်နိုင်ပါသည်။

၂။ ရေကြီးနေစဉ်အတွင်း လိုက်နာရန် အချက်များ

ရေကြီးရေလျှံမှု စတင်ဖြစ်ပွားနေချိန်တွင် မှန်ကန်စွာ တုံ့ပြန်နိုင်ခြင်းက မိမိနှင့် မိသားစု၏ ဘေးကင်းလုံခြုံရေးကို များစွာ အထောက်အကူပြုနိုင်ပါသည်။ အရေးပေါ်အခြေအနေတွင် စိတ်အေးအေးထားပြီး အောက်ပါအချက်များကို လိုက်နာသင့်ပါသည်။

လျှပ်စစ်အန္တရာယ်ကို သတိပြုပါ_အိမ်ထဲ ရေဝင်ရောက်လာပါက လျှပ်စစ်ဓာတ်လိုက်မှုအန္တရာယ်ကို လျှော့ချနိုင်ရန် Main Switch ကို ချက်ချင်းပိတ်ပြီး လျှပ်စစ်ပစ္စည်းများကို အသုံးမပြုပါနှင့်။

ဘေးကင်းရာနေရာသို့ ရွှေ့ပြောင်းပါ_ရေအမြင့်တက်လာပါက အိမ်အပေါ်ထပ်၊ ကုန်းမြင့်နေရာ သို့မဟုတ် တာဝန်ရှိအဖွဲ့အစည်းများ သတ်မှတ်ထားသော ကယ်ဆယ်ရေးစခန်းများသို့ အမြန်ဆုံး ရွှေ့ပြောင်းပါ။

ရေစီးနေသောနေရာများကို ဖြတ်သန်းခြင်းမှ ရှောင်ကြဉ်ပါ_ရေတိမ်သည်ဟု ထင်ရသော်လည်း ရေအောက်ရှိ မြောင်းများ၊ ချိုင့်ခွက်များနှင့် အန္တရာယ်ရှိသော အရာဝတ္ထုများကို မမြင်နိုင်သဖြင့် လမ်းလျှောက်ခြင်းနှင့် မော်တော်ယာဉ် မောင်းနှင်ခြင်းကို ရှောင်ကြဉ်သင့်ပါသည်။

သန့်ရှင်းသော ရေနှင့် အစားအစာကိုသာ အသုံးပြုပါ_ညစ်ညမ်းရေကြောင့် ရောဂါပိုးများ ကူးစက်နိုင်သောကြောင့် ကျိုချက်ထားသောရေ သို့မဟုတ် သန့်စင်ထားသော သောက်သုံးရေကိုသာ အသုံးပြုပါ။

အဆိပ်ရှိသတ္တဝါများကို သတိပြုပါ_ရေတက်လာချိန်တွင် မြွေ၊ ကင်းခြေများနှင့် အခြားသတ္တဝါများ အိမ်အတွင်းသို့ ဝင်ရောက်ခိုလှုံလာနိုင်သဖြင့် အထူးဂရုစိုက်ပါ။

ရေကြီးနေစဉ်အတွင်း မှန်ကန်စွာ တုံ့ပြန်ခြင်းနှင့် တာဝန်ရှိအဖွဲ့အစည်းများ၏ ညွှန်ကြားချက်များကို လိုက်နာခြင်းက အန္တရာယ်များကို လျှော့ချနိုင်ရန် အရေးကြီးပါသည်။ 

၃။ ရေကျသွားပြီးနောက် လိုက်နာရန် အချက်များ

ရေကျသွားပြီးနောက်တွင်လည်း နောက်ဆက်တွဲအန္တရာယ်များ ရှိနိုင်သဖြင့် သန့်ရှင်းရေး၊ ကျန်းမာရေးနှင့် လျှပ်စစ်အန္တရာယ်များကို ဆက်လက်ဂရုစိုက်ရန် လိုအပ်ပါသည်။ 

အိမ်နှင့် ပတ်ဝန်းကျင်ကို သန့်ရှင်းရေးပြုလုပ်ပါ_ရေဝပ်နေသောနေရာများနှင့် အညစ်အကြေးများကို ရှင်းလင်းပြီး ရောဂါပိုးပျံ့နှံ့မှုကို လျှော့ချပါ။

သန့်ရှင်းသော သောက်သုံးရေနှင့် အစားအစာကိုသာ အသုံးပြုပါ_သောက်ရေကို ကျိုချက်သောက်သုံးပြီး အစားအစာများကို သေချာချက်ပြုတ်၍ သန့်ရှင်းစွာ သိမ်းဆည်းပါ။

လျှပ်စစ်ပစ္စည်းများကို စစ်ဆေးပြီးမှ ပြန်လည်အသုံးပြုပါ_ရေစိုထားသော လျှပ်စစ်ပစ္စည်းများနှင့် ဝါယာကြိုးများကို လုံးဝခြောက်သွေ့ပြီး လိုအပ်ပါက ကျွမ်းကျင်သူ၏ စစ်ဆေးမှုခံယူပြီးမှ အသုံးပြုသင့်ပါသည်။

ခြင်နှင့် အဆိပ်ရှိသတ္တဝါများကို သတိပြုပါ_ရေဝပ်နေသောနေရာများကို ရှင်းလင်းပြီး ဖိနပ်၊ အဝတ်အစားနှင့် အသုံးအဆောင်များကို အသုံးမပြုမီ သေချာစစ်ဆေးပါ။

ဒဏ်ရာများကို လျစ်လျူမရှုပါနှင့်။ ရေထိတွေ့ထားသော ဒဏ်ရာများကို သန့်ရှင်းစွာ ဆေးကြောပြီး ရောင်ရမ်းခြင်း၊ ဖျားနာခြင်း သို့မဟုတ် ဒဏ်ရာပြင်းထန်ပါက ဆေးကုသမှု ခံယူပါ။

ရေကြီးရေလျှံမှုကို လုံးဝတားဆီးနိုင်ခြင်း မရှိသော်လည်း ကြိုတင်ပြင်ဆင်ထားခြင်းနှင့် မှန်ကန်သော လုံခြုံရေးအချက်များကို လိုက်နာခြင်းဖြင့် မိမိနှင့် မိသားစု၏ ဘေးကင်းလုံခြုံရေးကို ပိုမိုကာကွယ်နိုင်ပါသည်။

ဤအချက်အလက်များကို အကျိုးရှိသည်ဟု ယူဆပါက မိသားစုဝင်များနှင့် မိတ်ဆွေများကိုလည်း မျှဝေပေးပြီး မိုးရာသီကို ဘေးကင်းလုံခြုံစွာ ဖြတ်သန်းကြပါစို့။ 🌧️💙

🌟 အချို့သောအချက်အလက်များအား Internet မှတဆင့် ကိုးကားပါသည်။